मेरो अवस्था

बाँच्ने इच्छा कालले हेर खायो।।
मेरो यात्रा टुंगिने वार आयो।।
चल्दैनन् यी हात खुट्टा र माथ।
कस्को गर्ने जिन्दगीमा नि आश।। १

छोरा छोरी भेट्न आएर जान्छन्।
कोही कोही स्वर्ण ऐश्वर्य लान्छन्।।
आफैं उठ्ने हिड्न डुल्नै न सक्छु।
सारा भन्छन् पाटि पौवा म लग्छु।। २

मेरो   प्यारो   यो जवानी गएछ।।
माया भन्दा  मृत्यु प्यारो भएछ।।
सेतै रौं   भो ज्यान काम्दैछ हेर।
लौरो मात्रै   साथ   हिड्दैछ   हेर।। ३

पानी माग्दा त्यो खरानी घसेर।
तातो भन्दै हेर हाँस्छन् बसेर।।
छाती घाटी घ्यार्र गर्दैछ मेरो।
आँखा टाढा देख्न सक्दैन जेलो।। ४

मेरो आँखा धी अज्ञानी भएछ।
वाणी सुन्ने शक्ति अन्तै गएछ।।
मुट्ठी कस्दै लड्न खोज्दैछ काल।
फेरी पर्ने हो कि जन्मादि जाल।। ५

मैले   बाचुन्जेल   जे जे   कमाए।
मैले   बाचुन्जेल   जे जे   गुमाए।।
छाड्नै पर्ने  भो  नि सारा शरीर।
यो आत्माको संग के जान्छ ईश।।६

छन्द - शालिनी
शिर्षक - मेरो अवस्था
रचना - प्रकाशमणि खनाल

मेरो अनुभूति मेरो सिर्जना